Նասիմ Թալեբ / Nassim Taleb
Նասիմ Նիկոլաս Թալեբը ռիսկ-մենեջմենթի փորձագետ է և նախկին առևտրական։ Նա մասնագիտացած է խիստ հազվադեպ, անկանխատեսելի, բայց մեծ ազդեցություն թողնող իրադարձությունների ռիսկերը չեզոքացնելու գործում։ Դասավանդում է Նյու Յորքի համալսարանի՝ մաթեմատիկական գիտությունների Կուրանտի ինստիտուտում։ Կանխատեսումների և ռիսկերի վերաբերյալ մի շարք գրքերի հեղինակ է, այդ թվում՝ New York Times-ի վարկածով «Սև կարապը» և «Հակափխրունություն» բեսթսելերների:
Տնտեսագիտության և ֆինանսների վերաբերյալ բազմաթիվ գրքերի և գիտական հոդվածների հեղինակ է: Թալեբը հայտնի է իր «Սև կարապ» տեսությամբ, ըստ որի կան դժվար կանխատեսելի իրադարձություններ, որոնք կարող են անդառնալիորեն փոխել պատմության ընթացքը։
Նասիմ Թալեբը եղել է Լոնդոնի և Նյու Յորքի խոշոր բրոքերային ընկերությունների գործադիր տնօրեն, աշխատել է ֆոնդային բորսայում, այնուհետև հիմնել իր սեփական հեջ ֆոնդը: 1987 թվականի ֆոնդային բորսայի վթարը, որը հայտնի է որպես «Սև երկուշաբթի», ֆինանսական անկախություն բերեց քսանյոթամյա Թալեբին: 2004 թվականից նա հեռացավ արժեթղթերի շուկայից և իրեն նվիրեց դասավանդման, գիտության և գրչության արվեստին:
