Դուք կարող եք դրական, հարատև փոփոխություններ անել աշխարհում, և դրա համար պարտադիր չէ լինել հարուստ կամ հզոր ընկերություն ղեկավարել։
Բեսթսելերների հեղինակներ, մեր ժամանակաշրջանի ամենահարգված, աշխարհ փոխող մարդկանցից երկուսը՝ առաջնորդության փորձագետ Ջոն Մաքսվելը և գլոբալ զարգացման առաջնորդ Ռոբ Հոսքինսն առաջարկում են ոգեշնչող ու պրակտիկ ճանապարհային քարտեզ, որը կօգնի ձեզ դառնալ այն փոփոխությունը, որ ուզում եք տեսնել ձեր համայնքում և դրանից այն կողմ։
Մաքսվելն ու Հոսքինսն ասում են. «Իրականությունն այն է, որ մեզնից շատերը սպասում են, որ մեկ ուրիշը կգա և կլուծի այն խնդիրները, որ ինքներս նույնպես նկատում ենք»։
Ճշմարտությունն այն է, որ աշխարհի ճակատագիրն իսկապես ձեր ուսերին է դրված։ Կյանքը, որով ապրում եք, ամեն օր փոխում է աշխարհը, հավատաք դրան, թե ոչ։
Երբ դուք որոշում եք ապրել դրական արժեքներով և լինել լավ քաղաքացի ձեր համայնքի համար, աշխարհն ավելի լավն եք դարձնում։ Երբ որոշում եք ապրել բացասական արժեքներով ու ձեր համայնքից վերցնել այն, ինչ ուզում եք, ապա աշխարհն ավելի վատն եք դարձնում։ Կարևոր չէ, թե ինչ եք որոշում՝ ծառայել, երբ ձեր կարիքը կա, տալ, երբ խնդրում են, անտեսել մյուսներին, վերցնել ավելին, քան տալիս եք, ձեր ամեն մի որոշում ինչ-որ ձևով փոխում է աշխարհը։
