«Խորհրդածությունները» հեղինակի՝ ինքն իրեն հասցեագրված գրառումների ամբողջություն է։ Այս գրառումները նախատեսված չեն եղել հրապարակվելու համար, և հեղինակն ունեցել է երկու հիմնական նպատակ.
● իր համար որոշել կյանքի փիլիսոփայությունը և այն իդեալական բնավորությունը, որին արժե ձգտել,
● որպես իր պայքարի անբաժան մաս՝ փորձել համապատասխանել այս երկուսին։
Երկում Ավրելիուսն անդրադառնում է մի շարք համընդհանուր ճշմարտությունների, որոնք գրեթե 2000 տարի անց էլ չեն կորցրել իրենց արդիականությունը։
Ավրելիուսի մոտեցումները հասցրին նրան փիլիսոփայության արքայի կոչմանը։ Եվ այսպես, որո՞նք էին նրա գաղափարները։ Այս աշխատությունը վկայությունն է այն բանի, որ Ավրելիուսը մեծագույն ստոիկ փիլիսոփաներից է։ Նրա մտքերը մեծ ազդեցություն են թողել բազմաթիվ գրողների, ինչպես, օրինակ Ջոն Սթայնբեքի և քաղաքական առաջնորդների վրա։ Օրինակ՝ ԱՄՆ-ի նախկին նախագահ Բիլ Քլինթոնն այն համարում է իր սիրելի գիրքը։
Լինելով Մարկուս Ավրելիուսի փիլիսոփայական մտորումների ժողովածուն` «Խորհրդածությունները» չունի հստակ սյուժետային կառուցվածք։ Կազմված է 12 գրքից, որոնցից յուրաքանչյուրը կենտրոնանում է Ավրելիուսի կյանքի տարբեր ժամանակաշրջանների վրա։ Գրքերը դասավորված չեն ժամանակագրական հաջորդականությամբ և տարբեր ծավալ ունեն։ Ըստ երևույթին, Ավրելիուսը գրի է առել իր մտորումները Եվրոպայում ռազմական արշավների ժամանակ։ Որպես այդպիսին` 12 գրքերից յուրաքանչյուրը ներկայացված է հակիրճ ձեւով և շոշափում է մի շարք հայտնի թեմաներ` փիլիսոփայական կյանքով ապրելը, սոցիալական հարաբերությունները, բնությունը, աստվածները և մահկանացու լինելը։
